Gagana Samoa

Finauga sa le Taulau

O lo’u olaga a’oaoina sa fa’afaileleina lava i le motu tele i Salafai.  Maimau pe ana mafai ona toe liliu le taimi, ae se’i toe tepa tasi i tua i le olaga sa feagai ai. E ala usu i taeao uma i le fa’amamaina o le lotoa ae le’i usu i le aoga, tuua mai, a le’o le fai ose fa’alifu mo le aiga atoa, fesoasoani ia mama i le lalagaina o se ietoga mo lana asiasiga. Sa o lua lava le aoga ma le tautua i le aiga, aua e talitonu le manatu o ina tonu lava lea sa tupuga mai ai nei manuia ua ou mauaina.

 E tauivi tamaiti uma ina ia i’u ifo le aoga ua maua se aoga e alu iai. O lea la e fai ai lava ma mea masani o lo’u olaga le fa’auma muamua o feau fa’asaga ane ai loa e fa’afesaga’i ma le api ma le penitala. Sa fa’amuamua fo’i ia te a’u le fia auai  i se Kolisi Maualuga a le'o le Kolisi o Samoa, o le Kolisi i Vaipouli po’o le Kolisi fo’i  Avele. So’o se taimi lava o faiga suega e nofo anapopogi tagata uma o le nu’u ina ia iai se tamaitiiti o le latou nu’u e maua se fa’ailoga. Sa ou taumafai lava ina ia maua se aoga maualuga ou te alu iai, aua sa le taumateina i le loto e tali mai lava le Atua i talosaga sa tu’uina atu ia te ia.

          Na o’o i le tausaga mulimuli o le aoga, amata le tausaga ae mu le faleaoga sa fai lea ma fale lu’itau, o ina sa fofoa ai le olaga aoga o nai tamaiti. Peita’i e ui i le popole ma le fefe ae le’i fo’i ai le ola taumafai o nai tamaiti faiumu ae sulu ma le ulu ina ia maua se taui manaia o lena tausaga aoga. Na amata le aoga i taeao i le 7, o lona uiga e tatau ona vave usu e fa’auma feau o le taeao alu ai i le fale o le aiga lea e iai le vasega. Tausaga valu, aoga le taeao, aoauli ma le afiafi. E ofo le matou aiga aua o le tele o afiafi e taunu’u atu i le fale ua leva le po. Ua avea le le fiugofie ma ala sa i’u ai ma le manuia nai a’u taumafaiga. Na ausia togi e alu ai i le Kolisi o Vaipouli. Oka! le fiafia ua le mafai ona toe taofia.

         O le fa’afetai i le Tama ona o lena tali matagofie, e ui e le’i au i le Kolisi o Samoa, ae ou te le’i talitualimaina lana fa’amanuiaga sa aumaia mo lo’u nei tagata. Na o’o i le afiafi o’u telefoni mai i lo’u tina o a’u lea ua au i le aoga maualuga o Vaipouli. Mou le fa’anoanoa sa feagai ai ma le matou aiga, ona o le valaau paia a le Atua i le tina matua o le aiga, liua le fa’anoanoa i le fiafia ma le manatu tele sa tu mai i o’u luma o le’a fa’aa’ua’uina lava la’u aoga i le aoga lea ua ou maua. Peitai uma a’e le laugatogi ae fai se talanoaga a o’u matua ma nai o’u matua sa tausia a’u, pe o le’a ou alu ea i lea aoga. Sa ou tatalo lava ia fa’apea ifo lo’u tina o a’u o le’a fa’aa’ua’u lo’u ola aoaoina i le aoga lea. Peita’i ua toe liua le vai o Sina ina ua valaau mai lo’u tina ou te alu atu. O lana upu sa fa’apea mai  o a’u o le’a toe foi mai i Tutuila. O’u loimata ua maligi fa’avai e, paga e, le faigata sa feagai ai ona o le fia alu i se aoga maualuga ae ua sui fo’i manatu o o’u matua.