Gagana Samoa

Tausiga o tagata matutua i nofoaga pei o Fatuoaiga

O le tele o tagata matutua o auala ia fa’amanuiaga mo aiga ma fanau o lo’o ola ma tuputupu a’e i totonu o aiga Samoa ta’itasi.  E naunau uma aiga ia tausi lelei ma mafuta ma o latou matua pe a oo ina matutua.  E tolu ni vaega maumautūtū o le’a ou fa’amatalaina ai lea nofoaga. Muamua o le talaaga ma le mafuaaga tonu o le faia o lea maota gasegase i Fatuoaiga, Lua tepa i le aganu’u pe tatau ona ave tagata matutua i Fatuoaiga pe aisea fo’i. Vaega mulimuli o le fa’atalatalanoaina lea o ni tagata pe tatau ona ave i Fatuoaiga pe lē tatau fo’i.

I su’esu’ega i upega o tafa’ilagi o loo iai se tala fa’apea o lenei nofoaga sa fa’aigoa muamua o le Nazareth House American Samoa.  Ua suia nei le igoa o lea nofoaga i le House of Hope i Fatuoaiga aua o le maota lea o fa’amoemoega.  E molimau nisi o tama’ita’i o le taimi tonu lea ina ua tu’ua ai e le Sosaiete o Nasareta lea nofoaga mo le fa’aauauina i atunu’u mamao.  Ua suia lona igoa  ona o le fa’amoemoega o le to’atele o le maota lea e mapu ma alu ese ai tiga o tagata lautele pe’a asiasi atu i matua ma fanau o manuia lava.  O le manatu lea o le Katinale Pio Taofinuu sa faatauaina ai lenei nofoaga ma sui ai lona igoa i le Fatuoaiga ae faaigoa le tasi nofoaga faapenei i Upolu o le Mapu i Fagalele.

Sa ou fa’atalanoaina se tama’ita’i foma’i e suafa ia Fane Tuā e ala i lana galuega lea e faia i totonu o le maota o gasegase.  Sa ia ta’ua mai ai o se galuega faigata lava lona amataga; peita’i ane ina ua masani, ua pei lava o se galuega faigofie le tausiga o tagata matutua aemaise ai fanau e le o atoatoa le malosi o le tino.  O le leleiga ia te ia o lana tautua i tagata matutua ma fanau ia, o se tautua e lē maua pea.  Ua avea lea galuega ma fa’amanuiaga ia te ia ma lona aiga.  O lana molimau e lē ‘o avea lea galuega mo sona viiga po’o sona fa’amoemoega fo’i ina ia telē ai lona tamaoaiga e ala lea i le tulaga tau le seleni. Ua avea o se misiona mo ia aua lana tausiga i tagata matutua, ae o se viiga fo’i i le Ali’i ona o le mafanafana o le latou mafutaga ma nei matua aemaise ai le fanau. 

Sa talanoa mai foi ni isi o tinā matutua e suafa ia Logo ma Tinei Tunoa, o le aganu’u lava ia a Samoa ia tausi matua se’i i’u lelei le latou mafutaga ma tatalaina i le oti.  O se isi mafuaaga tele ua ave ai nei tagata i le nofoaga lea i Fatuoaiga, ona ua leai se tasi e nofo ai pe afai e faigaluega uma tagata o le aiga.  Molimau Tinei ua ala fo’i ona faia lea nofoaga ona o le manatu i aiga e lima vaivai pe le lava foi le fa’asoa e tausi ai matua tausi ma fanau e lē atoatoa le malosi o le tino.

E to’atele  nisi o fanau e misia le mafutaga vavalalata lea ma nai o latou matua tausi pe'a ave i ia nofoaga e pei o Fatuoaiga, ua galo ai fo’i le mafutaga mafanafana lea sa maua i le taimi a’o maua lava le malosi o lo latou matua.  O ni fa’alagona sa o’otia ai tele lo’u loto, i le faitauina o le tala i “Fa’amanuiaga Motusia” sa tusia e Mario Nicky Esera, ona o se tulaga uiga ese ua manatu fanau mo le latou tinā, e ui i le latou manatu ona o se fesoasoani ua leai ni isi e tausi i si o latou tinā ae ua avea lea ma tulaga ua motusia fa’afuase’i ai se mafutaga mafana sa feagai ai ma o latou fanau ma le latou tinā.  I lo’u manatu, e iai lava se isi o le aiga sa tatau ona fai se faai’uga e nofo ma le galuega ona o le tausiga o le tina.  “Ua ai ulu tuana’i taisi,” po ua maua loa manuia galo matua.  Ua le manana’o e ma’imau se latou taimi e alu i le tausiga o le latou tua’a ae ua galo ai le mafanafana tele ma le vavalalata o le mafutaga a le tinā ma le fanau. 

Ae ui i lea e le’i mapu ai le tatalo a lea tinā i le Atua ina ia alofagia lana fanau ma fa’amanuia atu ia te’i latou. Ua latou mele manuia po’o fa’amanuiaga fo’i sa fuafuaina ma nānā i le loto o lenei tinā e fa’amanuia atu ai, e le gata i lana fanau, a’o fanau fo’i a lana fanau.  O tupe e maua I galuega e mo le taimi nei, a’o faamanuiaga mai matua e alu lava le olaga atoa o selesele mai.  E oo lava i ni fanau e tutupu mai i le tagata tausi matua, e le mafai ona ‘asa le faamanuiaga a le Atua.  O le matua e le mafai ona uma lona alofa I le fanau. E tumau pea i le tatalo mo latou tusa poo a o latou vaivaiga.

I le faitau atu i le tala i Tausaga Fa’apitoa mo ē Matutua sa lagona le fiafia tele ona o le faitama valea o matua tausi i fanau a o latou fanau ona o le tigā tele pe ‘a faalogo atu o sasa mai lana tama.  O le mafutaga e le ‘aumaua e fanau ia e ola ma tutupu mai ua leai ni o latou matua tausi.  E ese le matagofie o le ola fiafia o aiga i ia ona po ona o le tele o faamanuiaga e sapi ai pe a i’u lelei le tausiga i matua tausi.  E tatala lava i le oti mea uma e pei o upu e le uma le pule a matua i fanau se’i vagana le oti, e le uma fo’i le tausi a fanau i matua se’iloga e mavae le olaga lenei. O se fiafiaga tele lea i fanau pe ‘a soifua pea o latou matua tausi, ona o se lafitaga tele lea ia te’i latou pe ‘a o’o i le taimi e sasa ai e o latou matua.

O le fa’atinoga o se galuega alofa (Service Learning) sa ou faia I se polokalama masani a le A’oga Maualuga, o se tautua lea e aunoa ma se totogi o se tasi lea o fesoasoani tele mo matua ia o lo’o manaomia le fesoasoani. O se galuega matagofie le asiasi i lea maota gasegase, aua ua avea lea ma fa’amalosi’au i nisi o matua ma fanau e le’o lagonaina le alofa mafanafana o le nonofo fa’atasi o le aiga e tasi.  O se fiafiaga tele lenei i alo ma fanau o lo’o i aoga maualuluga.  I tausaga ta’itasi e lē misi ai se asiasiga a fanau i Fatuoaiga, latou te ave meaalofa, usu pese e fa’afiafia ai matua ia, aemaise ai le taimi e talatalanoa ma fefa’asoaa’i ai lagona o matua ia ma fanau.  Sa ou ofi atu i lenei polokalama i le tausaga 2009, o se avanoa sa ou fiafia tele ai.  Sa ou toe manatua ai si o’u tinā matua sa ou tausi i ai a’e le’i i’u lona soifua.  Sa ou fiafia tele ina ua ou va’ai atu i se tasi o tinā ma ona laufofoga fiafia ina ua vaai mai ua iai se tasi ua alu atu e asi ia.  O se tasi lea o aso e lē mafai ona galo ia te a’u, ona o se galuega lelei ua ou faia.  Sa usu a ma pese ma fai a ma tatalo. Ina ua lata i taimi ou te fa’amavae atu ai o lana toe upu mai, “Ia manuia oe pele.”  Sa o’o mai le loto vaivai ae sa fa’atasi mai lava le Atua ia te a’u ina ua ma faamavae ma le tina matua.

A’o o’u su’esu’e atili pea I lenei fesili, na ou maua ai fo’I nisi manatu e uiga I le aveese o matua e tuu I nofoaga e tausi faapitoa ai.  I le faitau atu i tala otooto a le Samoa News e ala i le nofoaga lea o le House of Hope i Fatuoaiga, o lea nofoaga e le’i fa’avaea tasia mo na’o tagata matutua, ae o le lautele o le atunuu. O ē uma e manaomia le fesoasoani fa’apitoa mo le va’ava’aiga o matua tausi ma fanau e le atoatoa le malosi o tino e mafai lava ona fa’aoo atu i le maota o gasegase i Fatuoaiga mo se fesoasoani.  Ua avea lea nofoaga ma fesoasoani tele i aiga faigaluega, ua avea lea ma ala e fa’afaigofie ai le latou galuega e aunoa ma se popole mai po’o lelei le tausiga o matua. Ae ua avea Fatuoaiga ma fesoasoani tele mo’i latou. I le fa’atalanoaina se tasi o tinā, i le ave ese atu o le matua tausi ma le aiga sa lagona lava le fa’anoanoa ia i latou ae sa o’o fo’i le fiafia i le taimi e alu atu ai le asiasiga i Fatuoaiga o lo’o lelei lava le tausiga o le latou matua. O se nofoaga lelei lea nofoaga o Fatuoaiga  mo aiga olo’o mana’omia le fesoasoani.

E iai itu faanoanoa ae iai fo’i le aoga tele o lenei nofoaga ma e oo mai ai foi le fiafia. E aoga le tausi i matua aua o le isi lea o ala manuia mo’i tatou i le lumana’i.  O le itu e faanoanoa ai, o se mafutaga mafana ae motusia ona ua avea matua i Fatuoaiga.  E motusia atu ai ma fa’amanuiaga o le tagata sa mafaufauina e matua. O le mele o manuia o se tulaga le talafeagai lea i fanau Samoa.   O se fautuaga mo tagata o loo fia ave o latou matua ona ua le mana’o e tausi, ‘Aua le maua loa manuia galo le alofa o matua sa tausi ai i taua ma le fa’amaoni.  Po’o fea lava e lele ai le toloa e ma’au lava i le vai. O fea e te alu ai o le aiga lava le to’omaga sili.  Aepeitai, o le itu ua aoga tele ai lea nofoaga, e tele matua ua maua ai le toomaga.  O le tausiga o matua i Fatuoaiga o se tulaga matagofie lea, aua o se fesoasoani tele foi lea mo aiga o lo’o mana’omia le fesoasoani ma aiga lima vaivai, e le lava le fa’asoa.  O nisi o matua sa leai se isi e tausia lelei i le aiga ona o le o uma e faigaluega, o lea ua vaaia lelei e tama’ita’i o tausia i le aso atoa.  I le i’uga o lenei su’esu’ega e taumafai e tali le fesili i le amataga, ua ou mautinoa ai, e le o se mea e manatu mama i ai le aveese o matua mai totonu o le aiga pe a oo ina matutua, vagana ua iai se tulaga e le ma’alofia ona tatau ai lea.