tusituisga-vasega-sam-251

Nei Vale Tu'ulima le Tofi

Tue, 03 Dec 2013 01:32:24 +0100

Ne'i Vale Tu'ulima le Tofi

E ese le logomalie o tusitusiga a'o saunoaga fo'i a le Afioga i le Tamaaiga Tui Atua Tamasese Taisi Efi. I le tele o ana tusitusiga o lo'o ia fautua mai lava i le taua ma le aoga tele o le gagana Samoa i le ola tuputupu a'e o le tamaitiiti Samoa. O lea sa ia mmanatu ai e tusia lana pepa lea i tala masani e na te fa'alogoina a'o tulei ai se matua alofa i sana fanau ina ia va'ai le tofi i ne'i vale tu'ulima. O nei upu o le fa'avae lea o le olaga o le tagata Samoa (ASCC, 2008).

O lo'o tusia e Tamasese, "O le amataga o le tulu'iga o le tofi, o le gagana" (ASCC, 2008). O lona uiga o le tofi e ao ina u'u mau ina ne’i afaina ma fa’afaigata ai ona fai le galuega o le fa’asoa. “O le fa’asoa o le mau e momoli ai le feau i mafaufau ma agaga” (ASCC, 2008). O le aoga o le fa’asoa e fa’afaigofie ai ona momoli se feau ma e fesoasoani lea ina ia aua nei galo e se tamaitiiti a’o tuputupu a’e. O se fa’ataitaiga lata mai, sa fa’asoa mai le tina o lo’u tina talaaga o lo matou aiga i a’i matou. Sa ia fa’asoa mai fo’i le fua o a matou fanua aemaise fo’i suafa matai le matou aiga. O nei talaaga o lo’o tumau pea i le loto, ae o se tasi lea o meaalofa sa fa’asoa mai ai si o’u tina ia te a’u.

O le molimau a le Afioga ia Tamasese, “Afai e tafea i le au le tofi o Samoa, ua leai se Samoa ua leai fo’i ni tagata Samoa” (ASCC, 2008). E le’o le taimi muamua lea ua taua ai e le Afioga ia Tamasese lea fasi fuaitau aua o lona naunautaiga lava ina ia ola le gagana Samoa ae maise fo’i le aganu’u ua amata ona mou ona o le fetuleni mai o tomai eseese i totonu o le tatou atunu’u.

I so’u malamalamaaga i le molimau ou te matua’i lagolagoina fautuaga a le Afioga ia Tamasese ina ia aua le mapu le fa’asoa a’o se taulogologo i tupulaga lalovaoa a le atunu’u. Peita’i e le mafai e le tamaitiiti ona malamalama ma lagona se fia fa’asoa pe’a u’u mau e matua talaaga a’o taua fo’i o suafa matai, fanua ma tala o nu’u ae le fa’asoa. Ma’imau pe ana o’o mai i nei vaitau ua iai lava le vaega o le atunu’u e iai se faleaoga o le gagana ma le aganu’u. Ua peiseai ua anoanoa’i fa’afitauli ua lepetia ai le gagana ma ua tauau ai ina a le mafai ona toe tau napa atu i le tofi. O lea e tatau ma taua ai le fa’asoa pea o le tofi ina ne’i ma’uma’u.

Alagaoa

ASCC. (2008). Fa’atautaiga Manusina. Ne’i Vale Tu’ulima le Tofi. Tusia e le Afioga Tamaaiga Tui Atua Tupua Tamasese Taisi Efi. (p. 86)

O le Gagana, o le Suau'u lea e Ola ai le Aganu'u

Tue, 03 Dec 2013 01:31:19 +0100

O le Gagana, o le Suau’u lea e Ola ai le Aganu’u

O le molimau a le Afioga i le Matua ia Togiola Talalelei Tulafono, “O le gagana o se mea suamalie lea ia te ia” (ASCC, 2008). Ae pe’ita’i ua tele ni fa’aletonu ua a’afia ai le gagana o le tele o suiga fou ua ofi mai i le tatou atunu’u. Sa ia toe pa’ia ai se manatu sa fa’alia muamua mai e le Afioga ia Tupua Tamasese o le taua tele pe ana i aia se lomifefiloi o upu ma alagaupu ma o latou uiga e fesoasoani ai i tupulaga o lo’o fia malamalama i la tatou gagana. Na tusia fo’i e le Afioga Togiola se manatu fa’apea ua oge upu tupulaga o le atunu’u (ASCC, 2008). Ae peita’i i se molimau a se tasi o tuaā ina ua fa’aeaina lona alo ma fa’au’uina i ni fa’ailoga maualuluga sa ia fa’apea ai “O ituaiga aso nei e lē oge upu ai Samoa” (Coe, 2010). E peiseaī o aso fa’apea e mau upu ai le tagata.

O lo’o molimau fo’i le Afioga Togiola i le felanulanua’i ma le pulepule o le gagana ua ia i ona po nei. Ua tele ona fa’aoga fa’atasi le gagana Samoa ma le gagana Peretania i le taimi e tasi (ASCC, 2008). O le ala lea o lo’o ia fautua mai ai ina ia a’oa’o fanau ma ia iloa e tagata Samoa uma vaega o le gagana, ma e ao ona togafitia i ni faiga vaevave ae le’i tuai. Ia saili mai ma fa’aoga togafiti ua fa’amaonia e fa’aolaola ai le gagana aemaise ai fo’i e tatau ona fau ni taiala mautu o ni fa’atinoga e talia ma malilie fa’atasi uma ai. Ia avea ia ta’iala ma faiga e puipui ma fa’aolaola ai le gagana. (ASCC, 2008).

E mafai lava ona fa’aleleia le tatou gagana pe’a galulue tagata ua i le a’oa’oina ma ia fa’atauaina le gagana tautala. Ou te manatu, o le ogatasi o le lelei o le gagana tautala e fesoasoani malosi i le fa’amasaniina i so’o se tofiga e fai e le gata i totonu o a’oa’oga, o ekalesia ae maise ai aiga. I sa’u taofi i le fautuaga a le matua ia Togiola o le gagana o le suau’u lea e fesoasoani malosi ina ia ola ola lelei le gagana. Ma’imau pe ana o’o mai i nei vaitau ua a’e se finagalo o le ta’ita’i o le malo ina ia fa’atu ni aoga tau le gagana ma le aganu’u ina ia fa’aolaola ai pea le tatou gagana ua amata ona mou malie atu. “O le Toa o Samoa - o lana au’upega – o lana gagana” (ASCC, 2008).

Alagaoa

ASCC. (2008). Fa’atautaiga Manusina. O le Gagana, o le Suau’u lea e Ola ai le Aganu’u. Tusia e le Afioga le Matua Togiola Talalelei Tulafono. (83)

Coe, M. (January 10, 2010). Samoa Times. In Taunu’u pea moemitiga a Lucilla Brunt i Fa’ailoga Maualuluga. Retrieved November 11, 2013 from http://www.samoatimes.co.nz/taunuu-pea-moemitiga-a-lucilla-brunt-i-faailoga-maualuluga/

E Afua i Magalafu Fa'amanuiaga

Tue, 03 Dec 2013 01:30:07 +0100

E Afua i Magalafu Faamanuiaga

“O le matua moepo e le o se matua moenoa, e moe i loimata ae ala i le tagi” (Pa’u, 2008). O le manatu o tagata matutua, e le mafai e se tama poo se tinā Samoa ona moe se’iloga ua atoa le fanau i le fale. E moe alaala, e moe manatunatu mo se lelei o lona lava aiga, aemaise le ola tuputupu a’e o le fanau. O lea sa taua e le Afioga ia Pa’u i lana folasaga sa tusia se taua o le gagana aemaise foi se naunautaiga o matua ina ia faafailele ma tapu’e pea fanau i tu ma aga e fa’apea foi i le gagana fa’atamali’i.

O le si’u leo lea o nai matua o lo’o lagonaina pea i nei ona po e le gata o lo latou naunau ina ia ola le tamaititi ma malamalama i le gagana ae ia iloa foi ona pulea lana amio i luma o tagata. Peita’i o lo’o tusia e le Afioga a Pa’u se tasi o faafitauli tau le gagana. Le fa’afitauli lena ua amata ai ona le malamalama le tupulaga fou i le gagana tautala mai aso anamua ma nisi foi o upu masani. O le mafuaaga, o nisi o tagata atamamai o le gagana ua le mafai ona latou fa’asoa pe ta’uina foi le tele o upu taua o le gagana i tupulaga ona o lo latou mafaufau ina nei avea le iloa o le gagana ma ala e faamaualuluga ma nei ola faufau ma faaseseina i upu na tu’uina atu iai (ASCC, 2008).

E lua ni tala sa fa’asoa mai ai le Afioga a Pa’u e le gata i le taua o le gagana a’o se fa’afitauli foi ua amata ma o loo tupu i nei ona po i le gagana. O le gagana e momoli ai se feau taua e pei o le naunau atu o le Vai (faletua o Tagaloa) i lana fanau ina ia saunia se taumafa mo lo laua tama e faapei ona faia e aiga ta’itasi o lo latou nu’u. O moomooga alofa ia o le tinā, ina nei fano atu le tamā ae le’i fa’amanuia i si ana fanau. Sa avea le naunau atu o le tina ma se tai foi o ala na faaoloaina ai le gagana i se tasi o upu sa tulei a’e ai le Afioga Tagaloa ina ua maea ona taumafa ma fa’apea ane ai “Fa’afetai tele le tautua, Ua malie le sua a Vai,” lea sa maua ai le upu Suavai ma ua avea ai ma upu fa’aaloalo o le umu. Ua amata ona mou atu le tele o vaega taua ma le anagata, sa faamemelo iai tuaa ua lagomau i tiasa (ASCC 2008).

O lo’o talanoa mai fo’i le Afioga ia Pa’u i se tasi o fa’afitauli o le gagana ma o lo’o vaaia pea lea faafitauli i nei ona aso. Le gagana tautala lea a le tamaitiiti. Ua le sa’o le aoaoina ma le faaogaga o le gagana e fanau peita’i e leo fanau e tu’uaia i le faaletonu o le gagana peitai o matua lava le fa’apogai aua o lo latou lea matafaioi o le tapenaina lea o fanau i le gagana ina iloa ona tautala ai. O nei ona po ua suamalie suiga fou e pei o le avea lea o le gagana Peretania ma gagana e fesootai ai. Ua vaaia foi nisi o aiga ua fesootai i le gagana Peretania i totonu o lo latou lava loto i fale. “Ua suamalie suiga fou i o tatou loto, ae galo ai le tautiga o tupulaga o le vavau i le fatuina o o ta titi e ala i la ta gagana, tatou te tiu ai i aso uma o le olaga” (ASCC, 2008).

Alagaoa

ASCC. (2008). Fa’atautaiga Manusina. E Afua i Magalafu Faamanuiaga. Tusia e le Afioga Pa’u S. P. Faleatua (p.79)

Gagana Samoa ma le Agaifanua

Tue, 03 Dec 2013 01:27:07 +0100

O le Gagana Samoa ma le Agaifanua

O lo'o fa'amamafaina mai e le tofa ia Tauese Pita Fiti Sunia le taua o le gagana Samoa ma le Agaifanua ma o lona manatu e tatau ona taumafai le matagaluega o a'oa'oga ma faiaoga e fau se mataupu e aofia ai vasega uma lava i le aoaoina o le gagana Samoa. Aua ua matauina, ua to'atele aoga ua iai o latou Samoan days, ua a'o lauga, o tauloto a fanau ae le se'i fa'asa'o muamua le gagana tautala. O le taumafai a'o se augani mai a le to'oto'o ia Tauese, ua tumu i manatu taua e uunaina ai i tatou ina ina o tatou galulue e laveai le againa o le gagana.

E faapefea la ona fau se laveai i totonu o a tatou aoga? E molimau Tauese e tatau i faiaoga ona fau ni polokalama mai lava i vasega laiti seia o'o i aoga maualuluga e a'oa'o ma koleni ai le mafaufau o le tamaititi ina ia tele lona malamalama i gagana Samoa lava ia. O lo'o taumafai le susuga ia Vaitinasa Salu Hunkin Finau e fau se polokalama ua faaigoaina o le Dual Language ina ia aoina mai ai le gagana Samoa mai lava i vasega laiti po'o le Early Childhood Education seia o'o atu i le vasega lima. E talitonu Salu e tatau lava ona fa'amasani le tamaititi mai lava i lona laititi i lana lava gagana o na a'oina lea o le gagana peretania mulimuli ane. Sa maea tapena lelei lava e tua'a tusi aemaise fo'i le faatulagaina o mata'itusi e amata ai ona ao le faitau a le tamaititi.

I le folasaga a le to'oto'o ia Tauese o lo'o manino ma malamalama le vaevaeina o ona vaega ma auala foi e ao ona faaogaina e fofo ai fa'afitauli uma o lo'o feagai ai ma ia vaega o le aganu'u ma le agaifanua a Samoa. E pei ona molimau le to’oto’o, ua afaina la tatou gagana.O’u te talitonu e moni ma fa’amaoni tele lenei mau aua o le to’atele o tama fanau a lo tatou atunuu ua le mafia ona tautala i le gagana. O nisi ua nao na malamalama ae ua le mafai ona tautala ai.

I lenei vaitau ua mana’o le faatonu o le matagaluega tau a’oa’oga e toe faaolaola le gagana, o lona a’oaoina ma lona faaogaga i totonu o so’o se faleaoga. Peita’i ua o’o le fa’afitauli o le gagana i se tulaga e mana’omia ai tele le togafitia. O lea o le aoga lea o le fa’amalosia o faiaoga e tatau ona malamalama lelei i gagana e lua ina ia fa’afaigofie ona fa’afoe lana galuega o le a’oa’oina o fanau, aemaise ia i loa lelei e le tamaititi le aoga o le gagana Samoa i lona lava olaga. “A tatou fa’apalapala ma faatuutuu, e iu ina ui le ma’i ma le toe maua sona fofo. A e a tatou faamalolosi ma tatou tali atu i lenei lui ma tatou finafinau mo le manuia o a tatou fanau i le lumanai, out e lagona ua tatou totogi se aitalafu mo a tatou fanau ma le atunuu” (ASCC, 2008). O lo’o i faiaoga le galuega lea o le aoaoina o le gagana ae e mautu ma lelei lenei taumafaiga pe’a auai faatasi uma ma matua e lagolago fanau ina ia iloa ona tautala i lana gagana aemaise ai le fa’atinoina o lana aganu’u ma lana agaifanua.

Alagaoa

ASCC. (2008). Fa’atautaiga Manusina. Gagana Samoa ma le Agaifanua, Tusia Tofa i le To’oto’o Tauese Pita Fiti Sunia. (p. 49)

O le Gagana o le Meaalofa

Tue, 03 Dec 2013 01:27:58 +0100

O le Gagana o le Meaalofa

“O le gagana o le meaalofa taua mo le tagata soifua; ua foaiina i ai e le Atua mo ana feso’otaiga” (ASCC, 2008). Ua tatou iloa lelei lava a leai se gagana e fa’afaigata feso’otaiga. O lo’o tusia e le susuga i le fa’afeagaiga ia Oka Fauolo “O le gagana ua le gata o se meaalofa, a o le meaalofa ua foai mai e avea ma totino tumau a le tagata.” E iloa gofie le tagata Samoa e le gata i lana tu, o ana aga aemaise ai fo’i o le gagana.

E matagofie la tatou gagana pe a tumau le tagata lava ia ma tausi pe fa’apelepele foi i lana mea totino ina ne’i mou. Ua tatou vaaia foi le tele ma le anoanoai o faafitauli ua tau amata ona a’afia ai la tatou gagana. E le gata i tupulaga o le talutalu fou ma ua va’aia lava le malosi o le tu ma aga mai fafo i totonu o le tatou atunu’u. O lo’o molimau mai se tasi o folasaga ua faaautuina o le O le tofi ma le Meaalofa o le Gagana: O lo’o feagai la tatou atunu’u ma ni fa’afitauli fita. Ua tauau ina lofia le gagana Samoa e le gagana Peretania talu ai tifaga, Televise, leition ma tusitusiga. I Samoa o le tofi o le gagana pe’itai ua tau amata ona faoa le tofi e ala I le lofia o le gagana Samoa i le gagana Peretania. O lo’o manino ma malamalama le fa’ataotoina e le susuga ia Oka Fauolo i totonu o lana folasaga le tele o suiga le maalofia e le gata i le gagana aemaise ai le faaaogaaga o nisi o upu, e pei o le faaigoaina o nisi o faiva a le atunu’u.

“O le gagana o le ola, e le gata ina tumau pea lona faaogaina e i latou e ona le gagana, ae fa’apea foi ona nofo sauna lea lava gagana e talia suiga fou e tula’i mai i lea taimi ma lea taimi ma e avea foi lea ma mea e fa’apea ai tagata, o se gagana tamaoaiga lea gagana (ASCC, 2008). Ioe, e taua tele le malamalama o le tamaititi Samoa i lana lava gagana, aua ina ne’i ia mele lea meaalofa taua ona sau lea o aso alu aso ae toe mau manatu i le fia iloa o le gagana. Sa molimau Tupua Tamasese i lana molimau mo le 51 tausaga o le tutoatasi o le malo o Samoa, “e o’o atu i le tau faai’ui’u o le senetusi lenei, ua au i le 3000 gagana a le lalolagi o lea mou. Afai e mou le gagana Samoa, ua maumau le sailiga malo a tuaa ma matua aua o le a avea I tatou o ni tagata ua nonofo aunuua i totonu o lo tatou lava atunuu. A mou le gagana, ua mou fo’i le feau e mafua ai ona tatou aofaga potopoto e o’o mai i nei ona po” (Tamasese, 2013). Talosia ia ae o’o atu i le lumana’i o lo’o ola ma fia malamalama pea tupulaga o le talutalu fou i le tatou gagana. Aua o le tumau pea lava o le gagana ma lona matagofie, e vaavaalua ma le tatou aganuu, pe afai tatou te faamautietie ma faatualuga ae aua le avea ma kolone a nisi gagana (ASCC, 2008).

Alagaoa

ASCC. (2008). Fa’atautaiga Manusina. Gagana Samoa: Ia Ola ma Oa le Gagana. Tusia e le Susuga faafeagaiga Oka Fauolo (p.7)

Tamasese, T. (June 1, 2013). Savali. In O le Tofi ma le Meaalofa o le Gagana. Retrieved October 15, 2013, from http://www.savalinews.com/2013/06/10/lauga-o-le-tofi-ma-le-meaalofa-o-le-gagana/.

Oceania: An overview of the involvement of women in fisheries activities in Oceania.

Tue, 03 Dec 2013 01:28:24 +0100

O se va’aiga i le Aofia o le itupa o Tama’ita’i i Gaioiga Tau Faigafaiva i le Vasatele

E tele tiute ma faiva o tama’itai po’o fafine aua le atina’eina ma le tausiga o lona lava aiga. E iloa fo’i le to’atele o nisi o fafine e iai lo latou tomai tau faigafaiva i a’au ma o se tasi lea o la latou tausiga i totonu o lo latou aiga mo aso fai so’o. I le Pasefika lava ia, ou te mautinoa o atunu’u uma lava, e iai lava fafine e popoto e fagogota i le a’au a’o ali’i po’o tamaloloa latou te fagogota i tuaau.

I faiva fa’alegataifale ua ma’ea tapena le folasaga ma le vaevaega o le tai e fagogota ai le itupa o ali’i aemaise foi le itupa o tamaitai. E ui ina le iloga tele ma ta’uta’ua faifine po’o tamaita’i i fagotaga ae pei lava o faiva ia o lo’o fai ma tausiga i aso fai so’o. I se tasi o folasaga ua fa’aulutalaina “Women’s social and economic role in the fisheries sector,” o lo’o fa’amatala ai, O fafine o le Pasefika e tele lo latou tomai i fagotaga eseese. O lo’o tusia ai fo’i, o le to’atele o fafine latou te galulue i kamupani i’a, i le sailiiliga (research) po’o le fea le ogasami ma le vaitau e ono alu ai se fagotaga, ae peita’i ua matauina o le tele o kamupani e peiseai ua tau le amanaia tama’itai po’o fafine i se galuega tau fagotaga.

O lo’o fa’amamafa lava i le tatou faitauga sa tu’uina mai “Oceania: An overview of the involvement of women in fisheries activities in Oceania,” Le aia tutusa o tagata uma. E moni o alii po’o tamaloloa e tele la latou galuega fai i totonu o so’o se atunu’u. Ona o le lē lava o fa’amaumauga i faigafaiva a le atunu’u e le tatau ai ona avea ma tulaga e ta’uesea pe vaai maulalo ai i galuega a fafine. Ae ua tatou iloa o faiva lava a tama’itai o lo’o fai ma tausiga ma e tali ai fo’i le mataai o a tatou aiga. O le naunauta’iga o le folasaga ina ia tutusa aia ma le va’aiga o tagata uma i so’o se galuega ma tiute e tofia ai (2002).

Sa talatalanoaina i le tatou fa’afaletui i le vaiaso ua mavae le mafuaaga o le le mafai ai e fafine ona fagogota i tuaau, ona o’i latou ia e fa’amemelo iai aiga ona o’i latou o i’oimata. Ma sa lagolagoina e le tinā ia Limala’u Leo’o ina ua fesiligia i se fa’atalatalanoaga sa fa’atautaia i luga o upega tafa’i lagi, ma o lana tali mai, “Mai lava i lona la’ititi o’i laua lava ma lona tina e fiafia e fai le faiva lea o le Ta-matapisu, Mata alili, ma le tele o nisi o figota i le gataifale ma sa ia fesiligia ai lona tina pe aisea laua te le sopo atu ai i tuaau, ae o le tali sa tu’uina ifo ia te ia, ona o le tuaau ua fa’asino lea i le malosi o aiga. O le tuaau lava ia e faigata ona sopoia e tama’itai ma fafine ona e sou ma e ono lepetia ai le ola.”

E ui ina le iloga tele tama’itai po’o fafine i faigafaiva ona o le le lava o fa’amaumauga, ae peiseai o tina lava latou te faia le aiga tausi ma o lo’o iai lava i tala fa’asolopito o le to’atele o tama’itai sa avea ma toa ma sa ausia fo’i tulaga tupu i aso ua mavae. O le iai o le aia tutusa i so’o se tofiga o le’a avea lea ma se tasi o fa’amamaavega i tagata lautele.

Alagaoa

Lambeth, L., et.al,. (2002). Oceania: An overview of the involvement of women in fisheries activities in Oceania.

Leo’o, L. (September 21, 2013). Fa’atalatalanoaga (Skype)

Oliver, D. L., (1989). Oceania: The Native Cultures of Australia and the Pasific Islands. In Women’s social and economic role in the fisheries sector. University of Hawaii Press.

Our sea of islands : O le Vasa o Motu

Tue, 03 Dec 2013 01:29:03 +0100

O le Vasa o Motu

I le folasaga a Epeli Hau’ofa olo’o tusia mai ai lona lava iloa i le vasa lea e iai le Polenisia, Melenisia aemaise ai ma le Mekoronesia. E lua ni vaega sa fa’amamafaina lava e Hau’ofa i lana tusitusiga. Muamua o le vaevaega o tagata, o ē maualuluga ma ta’ita’i fo’i, aemaise ai tagata lautele. O le fa’aleaga ma le va’aimaulalo o le tasi i le tasi, o le natura o tagata uma. E iai i latou o lo’o taumafai lava mo se lelei o ia lava pe’itai e iloa lava o lo’o iai le tagata o lo’o taumafai lava e fa’aleaga lea tagata. I le amataga o le folasaga a Ha’uofa sa talitonu o ia, i vaitau o le puleaga fa’akolone (pulea mai lea e papalagi o motu o le Pasefika) sa avea ma ala o le fa’alagolago o tagata o le Pasefika malo poo atunu’u tetele fo’i. O le ola fa’akolone ua peiseaī ua fa’ata’ita’i e nisi ma ola ai e pei ona tusia e Hau’ofa i le malo o Toga e ta’u tagata lautele o “me ‘a vale” po’o tagata valelea. Fai mai e le mananao e a’oa’o tagata lautele ae a’oa’o lava na’o ē mai aiga tutupu ma tagata maualuluga ina ne’i popoto atu le lautelega o tagata. Molimau Hau’ofa, e iai lava ta’ita’i sa latou taumafai e tete’e atu i puleaga fa’akolone ma talitonuga ia sa avea ma ala e fa’aseseina ai le lautelega o tagata e ala lea i le fa’alagolago i malo tetele. Peita’i e faigata lava ona fa’atino lea taumafaiga aua e iai lava i latou olo’o taumafai e fa’aleaga.

A’o fa’agasolo le folasaga a Hau’ofa sa mautu lava lona manatu e fa’apea e leai se mea e mafai e le vasa lea e iai le Polenisia, Melenisia ma le Mekoronesia ona e laiti ona motu ma latou te le mafai ona fa’afesaga’i ma malo tetele. Aepe’itai a’o fa’asolo sa ia taua ai le suia o lona mafafau ina ua valauina o ia e fa’asoa i Hawai’i. I lena faigamalaga sa ia va’aia ai le atumotu o Hawai’i, e peiseaī o lo’o tuputupu ma olaola pea le motu ma o lo’o fa’ato’ateleina pea tagata. O ‘ina na suia ai lona mafaufau, E leai! E lē la’ititi le Pasefika, olo’o tuputupu pea.

I se fa’atalatalanoaga sa fa’atautaia, sa lagolagoina e le tina ia Ti’a Tuiā le manatu lea e folasia mai e Ha’uofa, fai mai i tala tu’u e le manatu maulalo tagata ia’i latou lava. Pe’itai e iai lava le tofa ma le utaga loloto i tagata Pasefika. Fa’ata’ita’iga sa iai lava le agaga folau ia te’i latou, latou te femalaga’ai ma folau ai mai lea atunu’u i lea atunu’u, aepe’itai ua ala ona suia aso nei ona ua vaevaeina e papalagi le Pasefika e pei ona tusia i luga o le fa’afanua, ua iai laina ua va ai isi motu mai le isi motu. E pei ona tusitusia e Earl ma Jim i se tasi o tusi Landfalls of Paradise (2006) i le molimau a se tasi o tamaloa Europa e suafa ia Jacob Roggeveen (1722) sa faimalaga mai ma va’aaia ai “O tagata Samoa, o tagata folau” (p.135). E ui lava ina vaevaeina nei le Pasefika ae peita’i olo’o iai lava le tomai o tagata Pasefika e iloa ai le vasa. O le utaga loloto lea sa i ō tatou tuaā lea sa latou iloa ai igoa o fetu, iloa le ogasami, aemaise ai latou te iloa le taiala o matagi. Ae e ui lava ina ua vaevaeina le Pasefika e le uma ai le latalata o le mafutaga a tagata.

O nisi o tagata o lo’o iai lava le agaga o le feasiasia’i ma fa’aa’ina nisi o nu’u. E ui lava ina tele le tamaoaiga i le Pasefika, e le mafai ai ona fa’atapula’a lo latou va fealoa’i ma le fealolofaa’i i so’o se tasi. Matauina fo’i e to’atele nisi o tagata mai isi atunu’u e pei o Toga, Tokelau, Tuvalu, ma isi olo’o malaga mai i Samoa ma atia’e ai o latou lava aiga. Fa’ata’ita’iga i i le fa’atalatalanoaga o lo’u tamā (Simanu Leota) sa ia fa’apea mai ai, o lona tinā o le Tokelau sa malaga mai lava i Atafu ona o le feta’atauaiga o oloa po’o mea taulima fo’i mai lo latou atunu’u i totonu o Samoa ma sa ia faiaiga ai ma le tamā o lo’u tamā mai Muti’a tele. Ua ou fa’amaonia ai le mau a Hau’ofa “O tagata Pasefika, o tagata e ola fetausia’i, fealolofaa’i, ma fefa’asoaa’i.”

O lo’o taua e Hau’ofa “O le vasa ua fa’atusaina o se tinā, e alofa i so’o se tasi e alofa ia te ia ma na te fa’afailele i so’o se tasi.” E ui i le malolosi o malo tetele ma latou te taumafai e pulea le vasa, pe’itai e iai lava le malosiaga olo’o i totonu o tagata Pasefika, Melenisia, ma tagata Mekoronesia latou te iloa ai o le vasa o se tasi lea o meatotino taua mo’i latou. Ua molimauina e tele ma anoanoa’i le tamaoaiga olo’o i motu o le pasefika ae peita’i a tu’ufatasia ma malo tetele e iai lava le agaga lea o le va’ai maulalo i o tatou tagata. O le natura lava lea o le tagata soifua o le taumafai lava e fa’aleaga se mea lelei o lo’o taumafai e nisi, ma olo’o va’aia lava e o’o mai lava i ona po nei. E ui lava la ina o lo’o vaevae le Pasefika i ona lava motu, ae olo’o iai lava le feso’otaiga lea i le va nonofo ai o tagata. E tamaoaiga lava tagata Pasefika i ona lava laufanua ma lona si’omaga.

Alagaoa

Hau’ofa, E. (1993) Our Sea of Islands.

Hinz, E. R., & Howard, E. (2006) Landfalls of Paradise: Cruising Guide to the Pacific Islands. The Country, (p.135)

Leota, S. (September 18, 2013). Fa’atalatalanoaga

Tuiā, T. (September 16, 2013). Fa’atalatalanoaga