Sa faitauina mai e le matua o faiva i lana fa’afaletui (Vasega) se tala matagofie. O se tusi a se tama’ita’i talavou ua saili matagi atu i atunu’u mamao mo se togafitiga o se ma’i ua feagai ai ma ia. Peita’i ane e leai se fofo o lea ma’I ua a’afia ai o ia. O le ala lea o lona tusi mai i lona tinā ina ia fa’amagalo atu ia ma sona sese sa faia o le lē fa’alogo ia te ia.

Fa’apea mai le matua o faiva ia tusi sau tusi e tali atu i le tusi mai a lou alo.

_____________________________________________________________________________________

Mo si a'u tama fa'apelepeleina

O le fa'afetai i le Tama i le lagi ona o lenei tusi matagofie ua ou mauaina. E ui ina o ta valavala ae talitonu le loto le mafai ona tu'ulafoa'iina oe e le Tama i luga. Ua lagona le fiafia o le loto aua sa lilo i manatu ailoga o le'a taua toe talanoa, ae ui i lea e fa'afetai i le Tama ua tali mai i la'u tatalo sa tu'uina atu ia i ona luma. Sa ou nofo tatalo pea ina ia e fa'amagalo mai ia te a'u lou tina pe'afai ua sasi la'u tausiga ia te oe. Fa'afetai ai ia te oe ona o nei upu matagofie ua e tusi mai ai ia te a'u.

Paga le faigata o le ta valavala ai, maimau pe ana e ma'i mai o e inei ai pea ma a'u. Aua e leai lava se afaina ae i'u ai la'u tausiga ia te oe la'u pele. Ae aua e te popole mai i au uo, o lea o le'a ou alu e aumai i le taua fale matou te nonofo ai. O le'a ou tausi foi ma le fa'amaoni ia te'i latou e pei ona ou tausi ia te oe. Aua e te toe mafaufau mea ua tuana'i ae tepa pea i le lumana'i, aua e te loto vaivai aua o lea lava olo'o ou nofo tatalo pea mo oe ma ma'i po'o mafatiaga fo'i olo'o feagai ai ma oe. Ae o la'u toe upu ia te oe si a'u tama, aua ne'i muta lou fa'atuatua ae toaga e tatalo i le Atua aua e le pine ae tali mai o ia i lau tatalo.

Alofaaga mo oe le tama pele

Lou tina, Ma