Saili Matagi

Sa malaga mai Pili i Tutuila nei ona o le sailiina lea o se manuia mo ia ma nai ona matua o lo'o fa'amuli mai i le latou aiga i Salafai. Ina ua tulaueleele le va'a i le uafu i Fagatogo sa lagona lona fiafia ona ua ia to tuvae i le motu na ia fanau ai. A ua fa'ateteleina lona fiafia ina ua ia va'aia se teine aulelei tele i lea aso, e igoa ia Sina. Sa taunu'u atu lona aiga i le uafu latou te omai fa'atasi i le fale, ma lona manatu o le'a lelei le tausiga o ia e pei ona ola a'e i totonu o lona aiga moni. E ui ina malaga mai i le motu nei mo le sailiga manuia ae peitai, e talitonu le manatu e le tutusa aso uma. Ioe, sa taunu'u lava masalosaloga o si tama o Pili ona sa ia i'ite lava i le aso muamua na taunu'u mai ai, e le fiafia le tina o le aiga ia te ia. Sa fai lava ma mea masani a Pili lea mea o le maitau o uiga o le aiga. Sa auai mai i le aoga o le Kolisi Tu'ufa'atasi o Amerika Samoa aua o le autu moni lava lea o lona sau ina ia i'u lelei le aoga ma maua ai se lumana'i manuia mo le latou aiga.

O aso uma lava e usupo e fai feau, alu i le aoga e o'o lava i le taimi e moe ai Pili o fai lava feau a le aiga ona o lona popole i nei fasi pe tuli foi ia. A alu i le aoga ua moe ona o le le lava i le faiga o feau. Masalo o se agelu lea sa musumusu i le faiaoga ina ia fesoasoani ia Pili ma ave iai se tama'ita'i e fesoasoani ia Pili ina ia aua nei tuai lana sailiili ae ia tutusa ma le o o va'a o tamaiti uma i totonu o le vasega. Sa avea Sina ma fesoasoani tele ia Pili. O le avea o le tua'i so'o atu o Pili i le fale ma mafuaaga o le tuli o ia. Fa'afetai i le loto alofa o Sina i le ali'i o Pili lea sa ia ave ai ni fautuaga lelei ia Pili aua foi lona ola e le gata i totonu ole aiga ae mo le aoga fo'i. Sa i'u lava lea masaniga ma faigauo mamae a Pili ma Sina. Sa iloa mulimuli ane e le tina o Sina ua le mana'o Sina i le tama lea e manana'o ai o ia(tina) ma le tama o le aiga. Aua ua tonu lava i le mafaufau o Sina, e leai se aoga o le tele o mea ae leai se fiafia. O le tiga tele o tina, o le mafuaaga lea o alu ai loa i ana talavai i atunu'u i fafo e aunoa ma le iloa e Pili.

Sa o'otia tele le loto o Pili ina ua fa'alogo ua alu Sina, ae peita'i sa liua lona fa'anoanoa ina ua vala'au mai Sina e aua le popole ua uma ona talanoa i lona tina ma ua malamalama foi lona tina i lana tagi atu. Ua iai le manuia mo'i laua, aemaise ai a i'u lelei uma i laua o le'a tele manuia e feagai ma'i laua aua ua mausali le fa'avae o le laua faiga uo ona o le alofa. Sa lagona le fiafia o Pili e ui ina agaleagaina o ia e le aiga lea sa nofo iai ae peita'i e le tu'ulafoa'iina lava le tagata fa'amaoni e le Tama. A lea ua tali le Atua ia Pili, e le gata i le tama'ita'i lea sa momo'o iai lona loto ae ua maua foi le avanoa e fa'aauau ai lona ola a'oa'oina i atunu'u mamao ona o le loto alofa o Sina. E tali le Atua i le tagata e saili ma le filiga.